ឯកឧត្តមរដ្ឋមន្ត្រី វង សូត បានអញ្ចើញចូលរួមកពិធីបើកការប្រកួតកីឡាប៉ារ៉ាហ្គេមអាស៊ានលើកទី៨ នៅប្រទេសសឹង្ហបុរី

ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអនុប្រធានគណៈកម្មាធិការជាតិប៉ារ៉ាអូឡាំ ពិក តំណាងសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានដឹកនាំប្រតិភូកម្ពុជាអញ្ជើញទៅចូលរួមបើកការប្រកួតកីឡាអាស៊ាន ប៉ារ៉ាអូឡាំពិកលើកទី៨ នៅប្រទេសសិង្ហបុរី។

ឯកឧត្តម ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការ ដែលបានអមដំណើរលោក វង សូត បានថ្លែងប្រាប់ Fresh News ពីប្រទេសសិង្ហបុរី នៅយប់ថ្ងៃទី០២ ខែធ្នូ ឆ្នាំ២០១៥នេះថា ការប្រកួតកីឡាអាស៊ានប៉ារ៉ាអូឡាំពិកលើកទី៨នេះ ធ្វើឡើងចាប់ពីថ្ងៃចាប់ពីថ្ងៃទី០៣-០៩ ខែធ្នូ។ កម្ពុជា បានបញ្ជូនកីឡាករ កីឡាការិនី ជាជនពិការប្រមាណ ២៩នាក់ ចូលប្រកួតប្រជែងជាមួយកីឡាករ កីឡាការិនីពិការជាង ១ពាន់នាក់ មកពីបណ្តាប្រទេស ជាសមាជិកអាស៊ានចំនួន ៩ផ្សេងទៀត។

សូមបញ្ជាក់ថា កីឡាករ កីឡាការិនីពិការកម្ពុជា ដែលដឹកនាំដោយលោក យី វាសនា អគ្គលេខាធិការគណៈកម្មាធិការប៉ារ៉ាអូឡាំពិក តែងទទួលបានបានមេដាយជូនជាតិ ជារៀងរាល់ឆ្នាំ នៅពេលពួកគេចេញទៅប្រកួតកីឡាអាស៊ានប៉ារ៉ាអូឡាំពិកនេះ៕