ក្រសួងមានឆន្ទៈ ផ្តល់មជ្ឈមណ្ឌល​ស្នាក់នៅ សម្រាប់ជនពិការដែលគ្មានទីពឹង

អគ្គលេខាធិការក្រុមប្រឹក្សាសកម្មភាពជនពិការ ឯកឧត្តម ឯម ច័ន្ទមករា បានលើកឡើងថា ក្រសួងសង្គមកិច្ច អតីតយុទ្ធជន និងយុវនីតិសម្បទា នឹងផ្តល់កន្លែងស្នាក់និងនិងឧបត្ថម្ភរបបអាហារ សម្រាប់ជនពិការ ដែលគ្មានទីពឹង ដែលស្ម័គ្រចិត្តមករស់នៅក្នុង មជ្ឈមណ្ឌលរបស់រដ្ឋក្នុងប្រទេសកម្ពុជា។

នៅក្នុងសិក្ខាសាលាថ្នាក់ជាតិ ស្តីពី ក្រុមជួយខ្លួនឯងរបស់ ជនពិការខ្សោយសត្តិបញ្ញា និងអូទីស្សឹម នៅព្រឹកថ្ងៃទី៦ ខែសីហា ឆ្នាំ២០១៥ នាភោជនីយដ្ឋានទន្លេបាសាក់ ២ ឯកឧត្តម ឯម ច័ន្ទមករា បានលើកឡើងថា រដ្ឋមន្ត្រីក្រសួងសង្គមកិច្ច ឯកឧត្តម វង្ស សូត ចង់ប្រមូលបងប្អូនជនពិការដែលគ្មានទីពឹង ក្រីក្រលំបាកមិនមានផ្ទះទាំងអស់ ដែលស្ម័គ្រចិត្តចង់រស់នៅក្នុងមណ្ឌល ក្រសួងនឹងផ្តល់នូវអាហារហូបចុកឲ្យពួកគាត់។

លោកថា «បងប្អូនពិការដែលចង់រស់នៅក្នុងមណ្ឌល នឹងផ្តល់អាហារហូបចុកចំនួន ៥.០០០រៀល ក្នុង១ថ្ងៃ។ ឧទាហរណ៍ ដូចក្រុមតន្ត្រីជនពិការមានគ្នា ១០នាក់ អីចឹងគាត់អាចទទួលបាន ៥ម៉ឺនរៀលក្នុងមួយថ្ងៃ ហើយវាអាចជួយកាត់បន្ថយ នូវការលំបាករបស់បងប្អូនជនពិការ របស់យើងផងដែរ»។

ឯកឧត្តម ឯម ច័ន្ទមករា បានបញ្ជាក់ថា យោងតាមការស្រាវជ្រាវរបស់វិទ្យាស្ថានស្ថិតិ កាលពីឆ្នាំ២០១៣ បានឲ្យដឹងថា ជនពិការនៅក្នុងប្រទេសកម្ពុជាមានប្រមាណជាង ៣០ម៉ឺននាក់ ហើយចំនួននេះ អាចកើនឡើងដល់ចំនួន ៥០ម៉ឺននាក់ នៅក្នុងឆ្នាំ២០១៥នេះ៕