ឯកឧត្តម ឯម ច័ន្ទមករា ទទូចឲ្យក្រសួង-ស្ថាប័ន រាជធានី-ខេត្ត បង្កើតក្រុមការងារសកម្មភាពពិការភាព

អគ្គលេខាធិការ និងជាសមាជិកអចិន្ត្រៃយ៍ក្រុមប្រឹក្សា សកម្មភាពជនពិការ ឯកឧត្តម ឯម ច័ន្ទមករា បានអំពាវនាវដោយ ទទូចឲ្យបណ្តាក្រសួង-ស្ថាប័ន និងសាលារាជធានី-ខេត្ត ពន្លឿនការបង្កើតនូវក្រុមការងារសកម្ម ភាពពិការភាព ដើម្បីឆ្លើយតបឲ្យទាន់ពេលវេលានូវតម្រូវការ និងបញ្ហារបស់ជនពិការ ខណៈបច្ចុប្បន្នមានក្រសួង ស្ថាប័ន និងសាលាខេត្តតិចតួចបំផុតបានបង្កើតក្រុមការងារមួយនេះ។

ការអំពាវនាវនេះធ្វើឡើងនៅក្នុងកម្មវិធី បើកសិក្ខាសាលាស្តីពី ការចងក្រងបណ្តាញជនពិការ ខ្សោយសតិបញ្ញា នៅមជ្ឍមណ្ឌលកិច្ចសហប្រតិបត្តិការជប៉ុន-កម្ពុជា CJCC នាថ្ងៃទី៣១ ខែមីនា ឆ្នាំ២០១៥។

សម្តេចតេជោ ហ៊ុន សែន ដែលជាប្រធានកិត្តិយសក្រុមប្រឹក្សាសកម្មភាពជនពិការផងដែរ នោះកាលពីថ្ងៃទី១០ ខែធ្នូ ឆ្នាំ២០១៣កន្លងទៅ បានប្រកាសឲ្យក្រសួងស្ថាប័ន សាលារាជធានី-ខេត្ត បង្កើតក្រុម ការងារសកម្មភាពពិការភាព ដើម្បីគ្រប់គ្រង និងដោះស្រាយបញ្ហារបស់ជនពិការឲ្យកាន់តែមានប្រសិទ្ធភាព។

បើតាមឯកឧត្តម ឯម ច័ន្ធមករា បានឲ្យដឹងថា រហូតដល់មដល់បច្ចុប្បន្ននេះ មានក្រសួងចំនួន៨ និងខេត្តចំនួន៥ បានបង្កើតក្រុមការងារសកម្មភាពពិការភាពរួចរាល់ហើយ។

ក្រសួងទាំង ៨នោះរួមមាន៖ ក្រសួងកិច្ចការនារី ក្រសួងអភិវឌ្ឍន៍ជនបទ ក្រសួងទីស្តីការគណៈរដ្ឋមន្រ្តី ក្រសួងឧស្សាហកម្ម និងសិប្បកម្ម ក្រសួងសាធារណការ និងដឹកជញ្ជូន ក្រសួងធម្មការ និងសាសនា ក្រសួងពាណិជ្ជកម្ម និងក្រសួងផែនការ។ ខេត្តទាំង ៥ រួមមាន៖ ខេត្តកែប កំពង់ធំ សៀមរាប ស្វាយរៀង និងខេត្តកណ្តាល។

ឯកឧត្តម ឯម ច័ន្ទមករា បានបញ្ជាក់ថា ការបង្កើតក្រុមប្រឹក្សាសកម្មភាពជនពិការនៅថ្នាក់រាជធានី ខេត្ត និងក្រុមការ ងារសកម្មភាពជនពិការនៅតាមក្រសួងស្ថាប័ន គឺពិតជាមានសារៈសំខាន់ក្នុងអនុវត្តយុទ្ធសាស្រ្តជាតិស្តីពីពិការភាព ការប្រមូលព័ត៌មាន ការសរសេររបាយការណ៍ស្តីពីស្ថានភាពជនពិការ ជូនរាជរដ្ឋាភិបាល និងជូនទៅអង្គការ សហប្រជាជាតិ ពិសេសការផ្តល់ផលប្រយោជន៍សម្រាប់ជនពិការ។

សូមបញ្ជាក់ថា នៅកម្ពុជា មានជនពិការសរុបប្រមាណ ២,០៦ភាគរយ ស្មើនឹង ៣០១.៦២៩នាក់ នៃប្រជាជនសរុប ដែលមានប្រមាណជា ១៥លាននាក់៕