សិក្ខាសាលាពិគ្រោះយោបល់លើសកម្មភាពជាអាទិភាព ទាក់ទងនឹងផ្នែកពិការភាពសម្រាប់កម្មវិធីសហប្រតិបត្តិការអូស្ត្រាលី កម្ពុជា ដើម្បីការផ្តល់សេវាប្រកបដោយនិរន្តរភាពនិងសមធម៌ (ហៅកាត់ថា ACCESS)

ជាមួយគ្នានេះ ឯកឧត្តមក៏នឹងសង្ឃឹមថា តាមរយៈការអនុវត្តអភិបាលកិច្ចនិងការអនុវត្តកម្មវិធីដើម្បីឱ្យស្របតាមកំណែទម្រង់ការគ្រប់គ្រង ហិរញ្ញវត្ថុសាធារណៈ (PFM) ក្រសួងសេដ្ឋកិច្ចនិងហិរញ្ញវត្ថុនៃកម្ពុជា នឹងមានការចូលរួមកាន់តែច្រើនជាងមុន ក្នុងការគិតគូរបម្រុងនូវថវិការដ្ឋសម្រាប់ វិស័យពិការភាពនៅកម្ពុជានាពេលខាងមុខនេះ។

ច្បាស់ណាស់ថា ជនដែលមានពិការភាព និងស្រ្តីដែលរងគ្រោះដោយ GBV នឹងទទួលបានអត្ថប្រយោជន៍ពីកម្មវិធី ACCESS ដើម្បីទទួលបាន សេវាកម្មប្រកបដោយនិរន្តរភាពគុណភាព ទាំងនៅថ្នាក់ជាតិនិងក្រោមជាតិ។ ក្នុងន័យនេះ ឯកឧត្តមបានចាត់ទុកថា ចេតនារបស់ក្រសួងការបរទេសនិងពាណិជ្ជកម្ម នៃប្រទេសអូស្ត្រាលី តាមរបស់គម្រោងកម្មវិធី ACCESS គឺជាកាលានុវត្តភាព ថ្មីមួយទៀត ក្នុងការបើកទំព័រជួយដល់វិស័យពិការភាពបន្ទាប់ ពីរដ្ឋាភិបាលកម្ពុជា បានអនុវត្តដោយជោគជ័យនៃផែនការយុទ្ធសាស្ត្រជាតិស្តីពីពិការភាព ២០១៤-២០១៨ នាពេលកន្លងទៅនេះ។

រាជរដ្ឋាភិបាលកម្ពុជា នឹងចូលរួមវិភាគទានមិនមែនជាសាច់ប្រាក់ ក្នុងអំឡុងពេលអនុវត្តកម្មវិធីនេះ តាមរយៈលទ្ធភាពនិងការប្តេជ្ញាចិត្តរបស់ ក្រសួងសេដ្ឋកិច្ចនិងហិរញ្ញវត្ថុ ក្រសួងកិច្ចការនារី ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រុមប្រឹក្សាសកម្មភាពជនពិការ ក៏ដូចជាអាជ្ញាធរថ្នាក់រាជធានី ខេត្តដែលពាក់ព័ន្ធ ក្រសួងស្ថាប័ន និងអង្គការស្ថាប័នផ្សេងទៀតដែលទទួលបានថវិកាពីរាជរដ្ឋាភិបាលទៅតាមការចាំបាច់។

ពិតណាស់ថា រាជរដ្ឋាភិបាលកម្ពុជា បានធ្វើការវិនិយោគលើវិស័យពិការភាពជាច្រើនឆ្នាំណាស់មកហើយ។ បច្ចុប្បន្ន ក្រោមការដឹកនាំប្រកប ដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា កំពុងដើរលើផ្លូវត្រូវក្នុងការស្តារនិងអភិវឌ្ឍមាតុប្រទេស ពិសេសការរក្សាបាននូវសុខសន្តិភាព ស្ថេរភាពនយោបាយ និងកំណើនសេដ្ឋកិច្ច ដែលជាឱកាសសម្រាប់លើកកម្ពស់សិទ្ធិជនមានពិការភាពនៅកម្ពុជា ពិសេសការផ្តល់នូវដីសម្បទាសង្គមកិច្ច និងការស្តារលទ្ធភាពពលកម្មកាយសម្បទាជូនជនមានពិការភាពបន្ថែមទៀត៕