កិច្ចប្រជុំវិសាមញ្ញលើកទី៤ របស់ក្រុមប្រឹក្សាសកម្មភាពជនពិការ ដែលមាន សមាជិក សមាជិកាមកពីក្រសួង ស្ថាប័ន និងតំណាងអាជ្ញាធរថ្នាក់ក្រោមជាតិ តំណាងអង្គការសង្គមស៊ីវិល ព្រមទាំងតំណាងជនមានពិការភាព

គោលបំណងនៃការរៀបចំឯកសារនេះ គឺដើម្បីកំណត់អាទិភាពយុទ្ធសាស្ត្ររបស់រាជរដ្ឋាភិបាល ក្នុងវិស័យពិការភាពដើម្បីធ្វើការបន្ស៊ី បញ្ជ្រាប និងដាក់បញ្ចូលបញ្ហាពិការភាពទៅក្នុងគ្រប់វិស័យ ដើម្បីបង្កើន ប្រសិទ្ធភាព តម្លាភាព និងសង្គតិភាពនៃយុទ្ធសាស្ត្រទាំងឡាយ ទាំងក្នុង ក្របខណ្ឌគោលនយោបាយជាតិគាំពារសង្គម ផែនការយុទ្ធសាស្ត្រអភិវឌ្ឍន៍ជាតិ គោលដៅអភិវឌ្ឍន៍ប្រកបដោយចីរភាពឬរបៀបវារៈឆ្នាំ២០៣០ ដែលបាន ប្តេជ្ញាចិត្តថា "មិនមាននរណាម្នាក់ត្រូវបានទុកចោល" ដើម្បីលើកកម្ពស់ សិទ្ធិសេរីភាពនិងការពារផលប្រយោជន៍ ទប់ស្កាត់ កាត់បន្ថយ និងលុបបំបាត់ការរើសអើងជនមានពិការភាព ពិសេសការគិតគូអំពីការស្តារ កាយសម្បទា សតិបញ្ញា និងវិជ្ជាជីវៈព្រមទាំងធានាលទ្ធភាពក្នុងការចូលរួមដ៏ពេញលេញនិងដោយស្មើភាពគ្រប់សកម្មភាពនានាក្នុងសង្គម។

ផែនការយុទ្ធសាស្រ្តជាតិស្តីពីពិការភាព ២០១៩-២០២៣ បានផ្ដោត លើការអភិវឌ្ឍសុខុមាលភាពជនមានពិការភាព តាមរយៈការបង្កើនប្រសិទ្ធភាព នៃការផ្ដល់សេវាសុខុមាលភាពនិងលើកកម្ពស់សិទ្ធិជនពិការ រៀបចំប្រព័ន្ធ គ្រប់គ្រងទិន្នន័យពិការភាពឱ្យបានជាក់លាក់ ការបណ្ដុះបណ្ដាលបច្ចេកទេស វិជ្ជាជីវៈនិងបង្កើតមុខរបរ កម្មវិធីឧបត្ថម្ភសាច់ប្រាក់សម្រាប់ជនមានពិការភាព ក្រីក្រនៅតាមសហគមន៍ រៀបចំហេដ្ឋារចនារូបវន្តបង្កលក្ខណៈងាយស្រួល សម្រាប់បម្លាស់ទី ព្រមទាំងការជំរុញការអនុវត្តលិខិតបទដ្ឋានគតិយុត្តទាក់ទង នឹងពិការភាព។

ផែនការយុទ្ធសាស្រ្តជាតិស្តីពីពិការភាព ២០១៩-២០២៣ លើកឡើង លម្អិតនូវគោលនយោបាយជាអាទិភាព ទិសដៅជាយុទ្ធសាស្រ្តនិងសកម្មភាព សំខាន់ៗ សម្រាប់ការឆ្លើយតបទៅនឹងតម្រូវការនិងបញ្ហាប្រឈមនានានៃ វិស័យពិការភាព សំដៅលើកកម្ពស់សមត្ថភាពក្រសួងស្ថាប័ន ពង្រឹងហេដ្ឋារចនាសម្ព័ន្ធសង្គមនិងសេដ្ឋកិច្ច ក្នុងទិសដៅបង្កើតកាលានុវត្តភាពការងារសមស្របសម្រាប់ជនមានពិការភាពក្នុងការកាត់បន្ថយភាពក្រីក្រនិងការចូលរួមរបស់ជនមានពិការភាពដោយពេញលេញនៅក្នុងសង្គម៕