ជំនួបពិភាក្សាក្រៅផ្លូវការដើម្បីពង្រឹងភាពជាដៃគូអនុវត្តការងារវិស័យពិការភាពរវាងស្ថានទូតអូស្ត្រាលីប្រចាំនៅកម្ពុជា ជាមួយអគ្គលេខាធិការដ្ឋានក្រុមប្រឹក្សាសកម្មភាពជនពិការ និងកម្មវិធី Access!

ជំនួបពិភាក្សាក្រៅផ្លូវការនេះត្រូវបានចូលរួមដោយឯកឧត្តម ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការ លោកស្រី Sarah Wadley លេខាទី១ នៃស្ថានទូតអូស្ត្រាលីប្រចាំនៅកម្ពុជា និងលោកស្រី អាន រូ ខៀវ ប្រធានកម្មវិធី ACCESS នៅរសៀលថ្ងៃទី១៦ ខែកក្កដា ឆ្នាំ២០២០ នៅភោជនីយដ្ឋាន ឌឹដ្រាម រាជធានីភ្នំពេញ។

អគ្គលេខាធិការក្រុមប្រឹក្សាសកម្មភាពជនពិការ ឯកឧត្តម ឯម ច័ន្ទមករា បានស្នើឱ្យដៃគូអភិវឌ្ឍពិនិត្យលទ្ធភាពបង្វែរថវិកាដែលបានគ្រោងកន្លងមកហើយមិនទាន់បានប្រើប្រាស់ គួរយកទៅជួយដល់ជនមានពិការភាពដែលកំពុងរងគ្រោះដោយជំងឺកូវីដ-១៩ ដើម្បីសម្រួលដល់ការលំបាករបស់បងប្អូនដែលមានពិការភាពនាពេលបច្ចុប្បន្ននេះ។

ឯកឧត្តម ឯម ច័ន្ទមករា ក៏បានផ្តួចផ្តើមគំនិតបង្កើតបណ្ណាល័យអនឡាញ ដែលអាចរក្សាទុកគ្រប់ទិន្នន័យ រូបថត វីដេអូ និងឯកសារទាំងអស់ពាក់ព័ន្ធវិស័យពិការភាពនៅកម្ពុជា ដើម្បីគ្រប់គ្នាអាចប្រើប្រាស់បានជាប្រយោជន៍បម្រើឱ្យវិស័យពិការភាព។

អគ្គលេខាធិការ ឯម ច័ន្ទមករា បានថ្លែងអំណរគុណដល់ស្ថានទូតអូស្ត្រាលី និងកម្មវិធី Access ដែលបានជួយផ្តល់សម្ភារៈការពារជំងឺកូវីដសម្រាប់ចែកដល់ជនមានពិការភាពយកទៅប្រើប្រាស់នាពេលកន្លងមក៕