អគ្គលេខាធិការដ្ឋានក្រុមប្រឹក្សាសកម្មភាពជនពិការ សហការជាមួយរដ្ឋបាលខេត្តកំពុងឆ្នាំង បានរៀបចំសិក្ខាសាលាផ្សព្វផ្សាយអំពីផែនការយុទ្ធសាស្រ្តជាតិ ស្តីពីពិការភាព២០១៩-២០២៣ និងបទដ្ឋានបច្ចេកទេសហេដ្ឋារចនាសម្ព័ន្ធ រូបវន្តបង្កលក្ខណៈងាយស្រួល សម្រាប់ជនមានពិការភាព

(កំពង់ឆ្នាំង)៖ អគ្គលេខាធិការដ្ឋានក្រុមប្រឹក្សាសកម្មភាពជនពិការ (អ.ក.ស.ជ) សហការជាមួយរដ្ឋបាលខេត្តកំពុងឆ្នាំង នៅព្រឹកថ្ងៃទី៣០ ខែកញ្ញា ឆ្នាំ២០២០នេះ បានរៀបចំសិក្ខាសាលាផ្សព្វផ្សាយអំពីផែនការយុទ្ធសាស្រ្តជាតិ ស្តីពីពិការភាព២០១៩-២០២៣ និងបទដ្ឋានបច្ចេកទេសហេដ្ឋារចនាសម្ព័ន្ធ រូបវន្តបង្កលក្ខណៈងាយស្រួល សម្រាប់ជនមានពិការភាព ដល់សមាជិកក្រុមប្រឹក្សាសម្មភាពជនពិការខេត្តកំពង់ឆ្នាំង។

សិក្ខាសាលានេះស្ថិតក្រោមអធិបតីភាព ឯកឧត្តម ស្រី ចាន់ អគ្គលេខាធិការង តំណាងលោក ឯម ច័ន្ទមករា អគ្គលេខាធិការ នៃអ.ក.ស.ជ និងជាសមាជិកអចិន្ត្រៃយ៍ និងឯកឧត្តម អម សុភា អភិបាលរងខេត្ត និងជាសមាជិកាក.ស.ជ តំណាងអភិបាលខេត្តកំពង់ឆ្នាំង និងជាប្រធានកិត្តិយស ក្រុមប្រឹក្សាសកម្មភាពជនពិការខេត្តខេត្តកំពង់ឆ្នាំង ព្រមទាំងអនុប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទា ខេត្តកំពង់ឆ្នាំង និងលោក លោកស្រី ជាអភិបាលរងក្រុងស្រុក និងអង្គភាពដែលពាក់ព័ន្ធជាច្រើនរូបផងដែរ។

ឯកឧត្តម ស្រី ចាន់ បានថ្លែងថា សិក្ខាសាសាផ្សព្វផ្សាយនេះ ក្នុងគោលបំណងជំរុញ ការធ្វើបរិយាបន្នពិការភាព ទៅក្នុងការអនុវត្តផែនការសកម្មភាពរបស់ ក្រសួង ស្ថាប័ន រដ្ឋបាលរាជធានី-ខេត្ត ធ្វើយ៉ាងណាឲ្យក្រុមគោលដៅ ដែលជាជនមានពិការភាព ទទួលបានអត្ថប្រយោជន៍ ចាកផុតពីអនក្ខរភាព ភាពក្រីក្រ ធានាសន្តិសុខប្រាក់ចំណូល កាត់បន្ថយភាពងាយរងគ្រោះផ្នែកហិរញ្ញវត្ថុ ឆ្លើយតបនឹងតម្រូវការជាក់ស្តែងរបស់ជនមានពិការភាពគ្រប់រូប និងគ្រប់ប្រភេទ ឈានទៅសម្រេចឲ្យបាននូវគុណភាពជីវិតរបស់ជនមានពិការភាពប្រកបដោយចីរភាព ទោះបីជាកម្ពុជាកំពុងស្ថិតក្នុងបរិការណ៍ និងកាលៈទេសៈ ទទួលរងផលប៉ះពាល់ នៃវិបត្តិជំងឺកូវីដ-១៩ក្តី។