រដ្ឋមន្រី្តក្រសួងព័ត៌មាន ឯកឧត្តម ខៀវ កាញារីទ្ធ បង្ហាញក្តីមោទនភាពព្រោះបានផ្តល់ឱកាសដល់ ជនមានពិការភាពចូលបម្រើការនៅក្រសួងព័ត៌មាន រហូតដល់ជាង ៣%នៃមន្ត្រីរាជការសរុបរបស់ក្រសួងព័ត៌មាន។

ការបង្ហាញភាពសប្បាយរីករាយបែបនេះ នៅក្នុងឱកាសដែលឯកឧត្តមរដ្ឋមន្ត្រី #ខៀវកាញារីទ្ធ និងលោកជំទាវ អញ្ជើញជួបសំណេះសំណាលជាមួយមន្រ្តីមានពិការភាពនៃក្រសួងព័ត៌មាន ព្រឹកថ្ងៃទី៥ ខែកុម្ភៈ ឆ្នាំ២០២១នៅទីស្តីការក្រសួង។

 

ជារៀងរាល់ឆ្នាំ ១ដង ឬ២ដង ថ្នាក់ដឹកនាំនៃក្រសួងព័ត៌មាន និងសប្បុរសជន តែងចុះសួរសុខទុក្ខដល់ជនមានពិការភាព រៀបចំម្ហូបអាហារ ព្រមទាំងបាននាំអំណោយជាច្រើនចែកជនមានពិការភាពនៅខេត្តកំពង់ចាម និងកណ្តាលជាដើម។

 

ក្រៅពីនេះ ឯកឧត្តមរដ្ឋមន្ត្រីព័ត៌មាននិងលោកជំទាវ បានចំណាយឧបត្ថម្ភថវិកាផ្ទាល់ដើម្បីជូនកុមារមានពិការភាព និងលោកគ្រូ អ្នកគ្រូ ធ្វើទស្សនកិច្ចកំសាន្តនៅតាមបណ្តាលខេត្តនានា ដូចជា កែប កំពង់សោម ក្រចេះ ពោធិសាត់ កំពង់ធំ កណ្តាល និងរាជធានីភ្នំពេញ មានព្រះបរមរាជវាំង វិមានឈ្នះឈ្នះ និងសួនសត្វសាហ្វារី ក្រោមការសម្រប ពីលោកជំទាវ ម៉ុង ម៉ារី ជាទីប្រឹក្សាក្រសួង និងសហការជាមួយប្រធានមន្ទីររាជធានី ខេត្ត បង្ករលក្ខណៈឱ្យកុមារមានពិការភាពបានដើរកំសាន្តរីករាយដូចកុមារដ៏ទៃផងដែរ ។

 

ដោយឡែកចាប់តាំងពីឆ្នាំ២០១៥មក ឯកឧត្តមរដ្ឋមន្ត្រី និងលោកជំទាវ ក៏បានចុះសួរសុខទុក្ខកុមារខ្សោយសតិបញ្ញា អូទីស្សឹម ព្រមទាំងបានឧបត្ថម្ភជាថវិកា សម្ភារៈសិក្សា និងសម្ភារៈប្រើប្រាស់ អង្ករវីតាមីន ផ្តល់អាហារ និងអង្ករ ៥០០គីឡូ ប្រចាំខែដល់អង្គការ ជំនួយក្តីសង្ឃឹមសម្រាប់សហគមន៍នៅក្រុងតាខ្មៅខេត្តកណ្តាល។

ដោយក្តីអាណិតស្រឡាញ់កុមារពិការទាំងនោះ លោកទាំងពីរ បានផ្តល់ដីផ្ទាល់ខ្លួនមួយកន្លែងមានទំហំ 1,371 ម៉ែត្រក្រឡា ស្ថិតនៅភូមិ ស្វាយរលំ ក្រុងតាខ្មៅ ខេត្តកណ្តាល សម្រាប់អង្គការប្រើប្រាស់ផងដែរ ។

 

ក្រៅពីនេះ ឯកឧត្តមរដ្ឋមន្ត្រី និងលោកជំទាវ បានយកចិត្តទុកដាក់ដល់ជនមានពិការភាពគ្រប់ទិសទី លោកតែងចូលរួមលើកទឹកចិត្តគ្រប់កម្មវិធីសប្បុរសធម៌របស់ជនមានពិការភាព អញ្ជើញជាអធិបតីក្នុងពិធីសម្ពោធស្ថានីយ៍វិទ្យុ ប្រគល់ពានរង្វាន់ដល់ការប្រឡងចម្រៀងជនពិការទូទាំងប្រទេស និងបានផ្តល់កិត្តិយសជាលោកមេបា ក្នុងការៀបអាពាហ៍ពិពាហ៍ កូនក្រមុំ កំលោះពិការភ្នែក និងជួយឧបត្ថម្ភគាំទ្រដល់ជនពិការដែលទៅប្រឡងនៅក្រៅប្រទេសផងដែរ៕