ទង់ប៉ារ៉ាអូឡាំពិកបានមកដល់កម្ពុជាជាមួយនឹងការអបអរសាទរតាំងពីអាកាសយានដ្ឋានដល់គណៈកម្មាធិការជាតិអូឡាំពិក

រដ្ឋមន្ត្រីការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ (CAMSOC) សម្ដេចពិជ័យសេនា ទៀ បាញ់ បានថ្លែងថា នេះជាប្រវត្តិសាស្ត្រថ្មីមួយនៃទស្សនទានកីឡា និងកិត្យានុភាពជាតិក្នុងការនាំមកនូវទង់សហព័ន្ធកីឡាអាស៊ានប៉ារ៉ា(APSF) មកកម្ពុជា។

 

សម្ដេចពិជ័យសេនាបានអំពាវនាវដល់ក្រសួង ស្ថាប័នគ្រប់ភាគីពាក់ព័ន្ធនិងពលរដ្ឋខ្មែរទាំងអស់ត្រៀមលក្ខណៈសម្បត្តិជាម្ចាស់ផ្ទះក្នុងការស្វាគមន៍ប្រតិភូកីឡាករ និងភ្ញៀវអន្តរជាតិមកពីជុំវិញពិភពលោកជាមួយនិងស្នាមញញឹមនិងឥរិយាបថថ្លៃថ្នូរ ចូលរួមរក្សាអនាម័យ និងបំបាត់ភាពអសកម្មក្នុងសង្គមដើម្បីលើកម្ពស់កិត្តិយសរបស់កម្ពុជាក្នុងព្រឹត្តិការណ៍ជាប្រវត្តិសាស្ត្រនេះ។

 

សម្ដេចពិជ័យសេនាថា៖ «ខ្ញុំសុំអំពាវនាវទាំងអស់គ្នាចូលរួមធ្វើជាម្ចាស់ផ្ទះទាំងអស់គ្នានៅគ្រប់ទិសទីទាំងអស់ឱ្យបានផុលផុសមែនទែនក្នុងព្រឹត្តិការណ៍កីឡារបស់យើងផងដែរ»។

 

នេះជាលើកទី១ហើយដែលកម្ពុជាទទួលធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម និងប៉ារ៉ាហ្គេម បន្ទាប់ពីកម្ពុជាសាងសង់បញ្ចប់១០០% នៃសំណង់ពហុកីឡដ្ឋានជាតិមរតកតេជោនៅរាជធានីភ្នំពេញ។

 

កាលពីយប់មិញនៅពហុកីឡដ្ឋាននៅប្រទេសឥណ្ឌូនេស៊ី ភ្លេងជាតិកម្ពុជាបានបន្លឺឡើង ខណៈឥណ្ឌូនេស៊ីបានប្រគល់ទង់អាស៊ានប៉ារ៉ាហ្គេមដល់គណៈប្រតិភូកម្ពុជាដែលនឹងត្រូវធ្វើជាម្ចាស់ផ្ទះការប្រកួតនោះនៅឆ្នាំ២០២៣។

 

តំណាងកម្ពុជាដែលទៅទទួលទង់មួយនេះ លោក ហ៊ុន ម៉ានី បានលើកឡើងថា៖ «ដោយក្តីមោទនៈជាទីបំផុត ថ្ងៃនេះកម្ពុជាបានទទួលទង់ជាផ្លូវការដើម្បីធ្វើជាម្ចាស់ផ្ទះរៀបចំការប្រកួតអាស៊ានប៉ារ៉ាហ្គេមលើកទី១២ ឆ្នាំ២០២៣។ កម្ពុជា សូមស្វាគមន៍!»

កីឡាអាស៊ានប៉ារ៉ាហ្គេមនឹងចាប់ផ្ដើមបន្តនៅថ្ងៃទី១ ខែមិថុនា និងបិទនៅថ្ងៃទី១០ ខែមិថុនា ឆ្នាំ២០២៣៕