ឯកឧត្តម ឯម ច័ន្ទមករា លើកឡើងពីកង្វះគ្រូជំនាញផ្នែកស្តារលទ្ធភាពពលកម្មកាយសម្បទាសម្រាប់ជនមានពិការភាព

ភ្នំពេញ៖ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម ឯម ច័ន្ទមករា បានលើកឡើងថា រាជរដ្ឋាភិបាលកម្ពុជាបានបង្កើតមជ្ឈមណ្ឌលស្តារលទ្ធភាពពលកម្មកាយសម្បទាសម្រាប់ជនមានពិការភាពចំនួន១១ នៅតាមរាជធានី-ខេត្ត។ ប៉ុន្តែកម្ពុជានៅតែខ្វះគ្រូជំនាញសម្រាប់គាំទ្រដល់ការផ្តល់សេវាស្តារលទ្ធភាពពលកម្មកាយសម្បទាដល់ជនមានពិការភាព។ 

ថ្លែងនៅក្នុងពិធីបើកសិក្ខាសាលាស្តីពី «សុខភាពនិងស្តារលទ្ធភាពពលកម្មសម្រាប់ជនមានពិការភាព» នាព្រឹកថ្ងៃទី១៣ ខែធ្នូ ឆ្នាំ២០២២ ឯកឧត្តម ឯម ច័ន្ទមករា បានលើកឡើងថា នៅប៉ុន្មានឆ្នាំចុងក្រោយនេះ វិស័យពិការភាពមានការរីកចម្រើន។ ឯកឧត្តមគូសបញ្ជាក់ថា រាជរដ្ឋាភិបាលកម្ពុជាបានខិតខំបង្កើតមជ្ឈមណ្ឌលស្តារលទ្ធភាពពលកម្មកាយសម្បទាចំនួន១១ នៅតាមរាជធានី-ខេត្ត រួមមានមណ្ឌលស្តារនីតិសម្បទា មណ្ឌលព្យាបាលថែទាំអ្នកមានវិប្បលាស មជ្ឈមណ្ឌលជាតិជនពិការ។ល។

ឯកឧត្តមបន្តថា នៅថ្មីៗនេះ រាជរដ្ឋាភិបាលក៏បានកសាងអគារថ្មីសម្រាប់ផ្តល់សេវាស្តារលទ្ធភាពពលកម្មកាយសម្បទាដល់ជនមានពិការភាព ចំនួន ២ខេត្តទៀតផងដែរ គឺខេត្តកំពង់ធំ និងខេត្តព្រះវិហារ។

ឯកឧត្តមបន្ថែមថា រាជរដ្ឋាភិបាលក៏បានផ្តល់អាទិភាពសម្រាប់ជនមានពិការភាពតាមរយៈការផ្តល់សេវាស្តារលទ្ធភាពពលកម្ម ការអប់រំបណ្តុះបណ្តាលវិជ្ជាជីវៈ ការបង្កើតមុខរបរនិងការងារ ការរៀបចំកសាងហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលដើម្បីបម្រើសេវាជូនជនមានពិការភាព។

តែយ៉ាងណាមិញ រដ្ឋលេខាធិការក្រសួងសង្គមកិច្ចបានទទួលស្គាល់ថា កម្ពុជានៅតែខ្វះគ្រូជំនាញផ្នែកខាងស្តារលទ្ធភាពពលកម្មកាយសម្បទាសម្រាប់ជនមានពិការភាព។ ឯកឧត្តមនិយាយដូច្នេះថា៖ «បច្ចុប្បន្នក្រៅពីមជ្ឃមណ្ឌលស្តារលទ្ធភាពពលកម្មកាយសម្បទាទាំង១១ ដែលរាជរដ្ឋាភិបាលបានបង្កើត ក៏មានគ្លីនិកឯកជនបង្កើតឡើងផងដែរ ប៉ុន្តែចំនួននៅមានកម្រិតនៅឡើយ បើធៀបនឹងប្រជាជនយើងទាំងមូលនៅកម្ពុជាដែលត្រូវការសេវាស្តារលទ្ធភាពពលកម្មកាយសម្បទា។ អ៊ីចឹងខ្ញុំគិតថា ការរៀបចំឱ្យមានការបំពាក់ឧបករណ៍ ការបង្កើតឱ្យមានគី្លនិកស្តារលទ្ធភាពពលកម្មកាយសម្បទាបន្ថែមទៀត និងបន្ថែមធនធានមនុស្សក្នុងវិស័យស្តារលទ្ធភាពពលកម្មគឺជារឿងចាំបាច់»។

ឯកឧត្តម ឯម ច័ន្ទមករា បានលើកទឹកចិត្តដល់គ្រូដែលមានជំនាញផ្នែកស្តារលទ្ធភាពពលកម្មកាយសម្បទាដល់ជនមានពិការភាពបន្តចែករំលែកបទពិសោធន៍ និងជំនាញដល់អ្នកដែលមានបំណងចង់រៀនជំនាញផ្នែកស្តារលទ្ធភាពពលកម្មកាយសម្បទាដល់ជនមានពិការភាព ដើម្បីពង្រីក និងបង្កើនធនធានមនុស្សក្នុងវិស័យពិការភាពឱ្យកាន់តែច្រើន។ 

ជាមួយគ្នានេះឯកឧត្តមបានថ្លែងអំណរគុណដល់ KOICA ដែលបានផ្តល់ទាំងថវិកា និងបច្ចេកទេសតាមរយៈ RI KOREA ដើម្បីចែករំលែកការអនុវត្តល្អ និងការយល់ដឹងពីលិខិតបទដ្ឋានគតិយុត្តពាក់ព័ន្ធនឹងសុខភាពនិងស្តារលទ្ធភាពពលកម្មសម្រាប់ជនមានពិការភាពនៅកម្ពុជា និងប្រទេសកូរ៉េខាងត្បូងដល់អ្នកពាក់ព័ន្ធ៕