មន្ត្រីអង្គការសហប្រជាជាតិ វាយតម្លៃខ្ពស់ លើកិច្ចខិតខំ ក្នុងវិស័យពិការភាពរបស់កម្ពុជា

មន្រ្តីតំណាងក្រុមការងារ លើវិស័យពិការភាព នៃទីភ្នាក់ ងារអង្គការសហប្រជាជាតិ បានវាយតម្លៃខ្ពស់ចំពោះ កិច្ច ខិតខំរបស់កម្ពុជា ក្នុងការធ្វើឲ្យជនពិការ កាន់តែទទួល បាននូវប្រយោជន៍ និងអាចរស់នៅបាន កាន់តែប្រសើរ នៅក្នុងសង្គម។

លោក វីលីប័រ តំណាងក្រុមការងារលើវិស័យពិការភាព នៃទីភ្នាក់ងារអង្គការសហប្រជាជាតិ ប្រចាំនៅកម្ពុជា ក្នុង ជំនួបជាមួយ ឯកឧត្តម ឯម ច័ន្ទមករា អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាសកម្មភាពជនពិការ កាលពីថ្ងៃទី២០ ខែឧសភា ឆ្នាំ២០១៤ បានសម្តែងនូវការ អបអរសាទរ និងវាយតម្លៃខ្ពស់ ចំពោះការរីកចម្រើនលើ វិស័យ ពិការភាពនាពេលកន្លងមក។ ជាពិសេស បាន ឈានដល់ចំណុចចុងក្រោយ ក្នុងការអនុម័តលើផែនការ យុទ្ធសាស្រ្តជាតិស្តីពីពិការភាព ឆ្នាំ២០១៤-២០១៨។

លោក វីលីប័រ បានថ្លែងថា នេះគឺបង្ហាញពីការយកចិត្តទុកដាក់ខ្ពស់ របស់រាជរដ្ឋាភិបាលកម្ពុជា តាមរយៈក្រុមប្រឹក្សាសកម្មភាព ជនពិការ ក៏ដូចជាក្រសួងសង្គមកិច្ច អតីតយុទ្ធជន និង យុវនីតិសម្បទាផងដែរ។

លោក វីលីប័រ ក៏បានស្នើឲ្យមានការផ្សព្វផ្សាយ ផែនការយុទ្ធសាស្រ្តនេះ ដល់ថ្នាក់ក្រោមជាតិបានជ្រួតជ្រាប ដើម្បីឲ្យថ្នាក់ក្រោម ជាតិ ដាក់បញ្ចូលផែនការយុទ្ធសាស្រ្តនេះ ចូលទៅក្នុងផែនការភូមិ ឃុំ របស់ក្រុមប្រឹក្សាឃុំ សង្កាត់របស់ខ្លួន ដោយអនុលោមតាម ប្រសាសន៍ របស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។

ឯកឧត្តម ឯម ច័ន្ទមករា អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាសកម្មភាពជនពិការ ក៏បានសម្តែងនូវការកោត សរសើរ និងថ្លែងអំណរគុណ ចំពោះសម្ព័ន្ធអង្គការសហប្រជាជាតិ ប្រចាំនៅកម្ពុជា ដែលមានកិច្ចសហប្រតិបត្តិការ យ៉ាងល្អ នាពេលកន្លងមក រួមមានកម្មវិធីអភិវឌ្ឍន៍ នៃអង្គការសហប្រជាជាតិ UNDP UNICEF និងអង្គការ AusAID ដែលបានរួមគ្នា ជួយដល់ជនពិការនៅកម្ពុជា ស្របគ្នាទៅនឹងផែនការ យុទ្ធសាស្ត្រជាតិស្តីពីពិការភាព របស់រាជរដ្ឋាភិបាលកម្ពុជា ។

ឯកឧត្តម ឯម ច័ន្ទមករា មានប្រសាសន៍ទៀតថា ការវិវត្តន៍ថ្មីៗពាក់ព័ន្ធលើវិស័យ ពិការភាពនៅកម្ពុជា រួមមាន៖ ការរៀបចំផែន ការយុទ្ធសាស្រ្តជាតិ ស្តីពីពិការភាព, ប្រកាស ស្តីពីការបង្កើតក្រុមប្រឹក្សា សកម្មភាពជនពិការ នៅថ្នាក់រាជធានី ខេត្ត ក៏ដូចជាក្រុម ការងារពិការភាព នៅតាមក្រសួង ស្ថាប័ន ដែលយន្តការទាំងពីរនេះ គឺជាសេនាធិការ ដ៏សំខាន់ក្នុងការចូលរួមចំណែក ជួយ អនុវត្តផែនការជាតិ ក៏ដូចជាការសរសេរ របាយការណ៍អំពីស្ថានភាព ជនពិការនៅកម្ពុជា ជូនអង្គការសហប្រជាជាតិ នាពេលដ៏ខ្លី ខាងមុខនេះ។

ឯកឧត្តម ក៏បានស្នើដល់សម្ព័ន្ធ អង្គការសហប្រជាជាតិ ប្រចាំនៅកម្ពុជា ជួយពិនិត្យពិចារណា លើការងារសំខាន់ៗចំនួន ៣គឺ៖ ១. ជួយកម្ពុជារៀបចំ ធ្វើបច្ចុប្បន្នភាព ស្ថិតិជនពិការនៅកម្ពុជា ដើម្បីឆ្លើយតបទៅនឹង តម្រូវការជុំវិញទាំង ឡាយរបស់ជនពិការ និងរាយការណ៍ជូនអង្គការសហប្រជាជាតិ, ២. ជួយដល់ក្រុមប្រឹក្សា សកម្មភាពជនពិការ ក្នុងការពង្រឹង និងកសាងសមត្ថភាព មន្រ្តីជំនាញបន្ថែមទៀត ដើម្បីអនុវត្តផែនការយុទ្ធសាស្រ្តជាតិ ស្តីពីពិការភាពឲ្យមានប្រសិទ្ធិភាពខ្ពស់ , ៣. ជួយផ្តល់អ្នកជំនាញ ការបច្ចេកទេស សម្រាប់ជួយធ្វើការតាមដាន និងវាយតម្លៃ ទាំងលើការអនុវត្តផែនការ យុទ្ធសាស្ត្រជាតិស្តីពី ពិការភាព ២០១៤-២០១៨ ក៏ដូចជា ធ្វើការតាមដាន និងវាយតម្លៃ ការអនុវត្តអនុសញ្ញា ស្តីពីសិទ្ធិជនពិការ នៅកម្ពុជា។

ជាការឆ្លើយតប លោក វីលីប័រ បានសម្តែងនូវការគាំទ្រ និងយល់ព្រមជួយក្នុងការ កសាងសមត្ថភាពរបស់សមាជិក ក្រុមប្រឹក្សា សកម្មភាពជនពិការ ទាំងនៅថ្នាក់ជាតិ និងថ្នាក់ក្រោមជាតិ ដើម្បីអនុវត្តផែនការយុទ្ធសាស្រ្តជាតិនេះ ប្រកបដោយភាពជោគជ័យ និងមានប្រសិទិ្ធភាពខ្ពស់បន្ថែមទៀត ។

គួរបញ្ជាក់ផងដែរ ឆ្នាំ២០១៤ នេះ ក្រុមការងារលើវិស័យពិការភាព នៃទីភា្នក់ងារអង្គការសហប្រជាជាតិ ប្រចាំនៅកម្ពុជា បាន សន្យានឹងផ្តល់ជំនួយ ថវិការយ:ពេល ៣ឆ្នាំ ដែលមានទឹកប្រាក់ចំនួន ១៥ម៉ឺន ដុល្លារសហរដ្ឋអាមេរិក ដើម្បីគាំទ្ររាល់សកម្ម ភាពរបស់ ក្រុមប្រឹក្សាសកម្មភាពជនពិការ៕