ក្រុមហ៊ុន Familiar Co., Ltd. សម្រេចផ្តល់ប្រាក់ជំនួយឥតសំណង ចំនួន 59,995,000JPY ជួយដល់អង្គការ PPCIL លើគម្រោងលើកកម្ពស់សិទ្ធិ និងការងារដល់ជនពិការ

ព្រឹកថ្ងៃទី ៩ ខែគុម្ភៈ នេះ ឯកឧត្តម ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការបាន ទទួលជួបលោក SHIMADA Masayuki អគ្គនាយកក្រុមហ៊ុន Familiar Co., Ltd. និងតំណាង JICA ប្រចាំនៅកម្ពុជា អំពីគម្រោងជួយជនពិការកម្ពុជាចេះផលិតដំណាប់ផ្លែឈើតាមស្តង់ដារអន្តរជាតិ។

តាមរយៈការគាំទ្រពីក្រុមប្រឹក្សាសកម្មភាពជនពិការ និងក្រសួងសង្គមកិច្ច អតីតយុទ្ធជន និងយុវនីតិសម្បទា ក្រុមហ៊ុន Familiar Co., Ltd. សម្រេចផ្តល់ប្រាក់ជំនួយឥតសំណង ចំនួន 59,995,000JPY តាមរយៈអង្គការ JICA នៅកម្ពុជា ជួយដល់អង្គការ PPCIL លើគម្រោងលើកកម្ពស់សិទ្ធិ និងការងារដល់ជនពិការ ដែលនេះគឺជាកាលានុវត្តភាពថ្មីមួយទៀតក្នុងវិស័យពិការភាពនៅកម្ពុជា។

បច្ចុប្បន្នគម្រោងនេះបានជ្រើសជនពិការជាច្រើនឲ្យទៅហ្វឹកហាត់ការផលិតនំ និងដំណាប់ផ្លែឈើ ដោយមានការជួយបង្ហាត់ពីអ្នកជំនាញការជនជាតិជប៉ុនមកពី ហុកកៃដូ ដើម្បីបង្រៀនអំពីរបៀបផលិត និងការវិចខ្ចប់ឲ្យមានអនាម័យ និងស្របតាមស្រង់ដារ។

នាខែមិថុនា ខាងមុននេះលោក SHIMADA Masayuki អគ្គនាយកក្រុមហ៊ុន Familiar Co., Ltd. បានអញ្ជើញឯកឧត្តម ឯម ច័ន្ទមករា ទៅទស្សនៈកិច្ចសិក្សានៅរោងចក្ររបស់លោកនៅប្រទេសជប៉ុន ហើយគាត់ប្រាប់ឯកឧត្តម ឯម ច័ន្ទមករា ថា បើទោះបីជាត្រូវចំណាយពេលច្រើនជាង ១០ឆ្នាំទៅមុខទៀត ដើម្បីជួយដល់ជនពិការកម្ពុជាឲ្យចេះផលិតនូវផលិតផលធ្វើដំណាប់ពីផ្លែធម្មជាតិនោះ ក៏លោកសុខចិត្តដែរ ព្រោះគឺជាការតបស្នងនិងជាការថ្លែងអរគុណចំពោះប្រជាជនកម្ពុជាដែលលើកដៃមុនគេបង្អស់ ដើម្បីបរិច្ចាគថវិកាដល់ប្រទេសជប៉ុន ក្នុងគ្រាដែលប្រទេសជប៉ុនជួបគ្រោះធម្មជាតិរញ្ជួយដីកាលពីប៉ុន្មានឆ្នាំមុននេះ។

លោក SHIMADA Masayuki មានប្រសាសន៍ថា លោកបានបណ្តាក់ទន់អស់ជាង ៧លានដុល្លាអាមេរិច ដើម្បីដំណើរក្រុមហ៊ុន Familiar Co., Ltd. របស់លោកជួយដល់ជនពិការក្នុងប្រទេសជប៉ុន។ សព្វថ្ងៃ ក្រុមហ៊ុនរបស់លោកមាននិយោជិក កម្មករចំនួន ៥០០នាក់ ក្នុងនោះជនពិការ ជនជាតិជប៉ុនមានចំនួន២០០នាក់។

បច្ចុប្បន្ននេះ ក្រុមហ៊ុន Familiar Co., Ltd. បាននាំចូលមកនូវម៉ាសុីនសម្រាប់ផលិតដំណាប់ផ្លែឈើមកដល់កម្ពុជាហើយរួមមានម៉ាសុីន៖ Ciller Electric Oven, Planeratry mixer, និងម៉ាសុីន Vaccuum packing។